ಮುಧೋಳ: ಸರಕಾರಗಳು ಗ್ರಾಮೀಣಾಭಿವೃದ್ಧಿಯಾಗಬೇಕು ಎಂಬ ಗಾಂಧಿ ಕನಸು ನನಸು ಮಾಡಲು ತಾಲೂಕಿನ ಮೆಳ್ಳಿಗೇರಿ ಗ್ರಾಪಂಗೆ ಅ.2 ರಂದು ಗ್ರಾಮ ಗಾಂಧಿ ಪುರಸ್ಕಾರ ಪ್ರಶಸ್ತಿ, 5 ಲಕ್ಷ ರೂ.ಪ್ರೋತ್ಸಾಹಕರ ಬಹುಮಾನ ಭಾನುವಾರ ವಿತರಣೆಯಾಗಲಿದೆ. ಸುಮ್ಮನೆಯಲ್ಲ ರಾಜ್ಯದೆಲ್ಲೆಡೆ ಗ್ರಾಮೀಣ ಪ್ರದೇಶಗಳಲ್ಲಿ ಒಳಚರಂಡಿ ನಿರ್ಮಾಣ ಮಾಡಿರುವುದು ದಾಖಲೆಯಿಲ್ಲ. ಆದರೆ ಮುಧೋಳ ತಾಲೂಕಿನ ಮೆಳ್ಳಿಗೇರಿ ಗ್ರಾಮದಲ್ಲಿ ದಾಖಲೆ ನಿರ್ಮಿಸಿದ್ದಾರೆ. ಇಡೀ ರಾಜ್ಯವೇ ಮೆಳ್ಳಿಗೇರಿಯತ್ತ ಗಮನಹರಿಸುವಂತೆ ಮಾಡಿದೆ. ಈ ಗ್ರಾಮಕ್ಕೆ ಹಾಗೆ ಸುಮ್ಮನೆ ಪ್ರಶಸ್ತಿ ಬಂದಿಲ್ಲ. ವಿಶೇಷ ಕಾಳಜಿ: ಹಿಂದಿನ ಅಧ್ಯಕ್ಷ ರಮೇಶ ಜೀರಗಾಳ ತಮ್ಮ ಅವಧಿಯಲ್ಲಿ ಹಲಗಲಿ ಗ್ರಾಪಂ ವ್ಯಾಪ್ತಿಯ ಮೆಳ್ಳಿಗೇರಿಯಲ್ಲಿ ಅಭಿವೃದ್ಧಿಗೆ ಮೊದಲ ಆದ್ಯತೆ ನೀಡಿದ್ದಾರೆ. ಸಾಕಷ್ಟು ಸಮಸ್ಯೆ ಎದುರಿಸಿ ವಿಶೇಷ ಕಾಳಜಿಯಿಂದ ಸಾಧಿಸಿ ತೋರಿಸಿದ್ದಾರೆ. ಒಳಚರಂಡಿ, ಶೌಚಾಲಯ, ಕುಡಿಯುವ ನೀರು, ಸಿಸಿ ರಸ್ತೆ , ತಿಪ್ಪೆಗುಂಡಿ, ಹೊಂಡಗಳನ್ನು ನಿರ್ಮಿಸಿ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಗ್ರಾಮೀಣಾಭಿವೃದ್ಧಿಗೆ ಮಹತ್ವ ಬರುವಂತೆ ಮಾಡಿದ್ದಾರೆ. ಈಗಲೂ ಬೇರೆ ಬೇರೆ ಗ್ರಾಪಂ ಸದಸ್ಯರು ನೋಡಲು ಗ್ರಾಮಕ್ಕೆ ಬರುತ್ತಿದ್ದಾರೆ. ಇಂದು ಪ್ರಧಾನ: ಅ.2 ರಂದು ಗಾಂಧೀಜಿ ಜಯಂತಿ ದಿನ ಬೆಂಗಳೂರಲ್ಲಿ ಸಿಎಂ ಸಿದ್ಧರಾಮಯ್ಯ ಹಾಗೂ ಗ್ರಾಮೀಣಾಭಿವೃದ್ಧಿ ಸಚಿವ ಎಚ್‌.ಕೆ.ಪಾಟೀಲ ಅವರಿಂದ ಗ್ರಾಪಂ ಅಧ್ಯಕ್ಷೆ ಹಾಗೂ ಮಾಜಿ ಅಧ್ಯಕ್ಷ ಹಾಗೂ ಹಾಲಿ ಸದಸ್ಯ ರಮೇಶ ಜೀರಗಾಳ, ಸದಸ್ಯರು, ಪಿಡಿಓ ಅಶೋಕ ಜನಗೌಂಡ ಪ್ರಶಸ್ತಿ ಸ್ವೀಕರಿಸಲಿದ್ದಾರೆ. ಅಭಿವೃದ್ಧಿ ಹೇಗೆ? ಹಿಂದಿನ ಅಧ್ಯಕ್ಷ ರಮೇಶ ಜೀರಗಾಳ ಊರಿಗೆ ಏನಾದರೂ ಕೊಡುಗೆ ನೀಡಬೇಕೆಂಬ ಉತ್ಕಟ್ಟ ಇಚ್ಛೆಯೇ ಮೆಳ್ಳಿಗೇರಿ ಗ್ರಾಮ ಇಡೀ ರಾಜ್ಯಕ್ಕೆ ಪರಿಚಯವಾಗುವಂತಾಗಿದೆ. ಆಗಿನ ಜಿಪಂ ಸಿಇಒ ಎಸ್‌.ಎಸ್‌.ನಕುಲ್‌, ಶಾಸಕ ಗೋವಿಂದ ಕಾರಜೋಳರು ಗ್ರಾಮಕ್ಕೆ ಅನುದಾನ ನೀಡಿದ್ದಾರೆ. ಆ ಪ್ರತಿಫಲದಿಂದ ಅಭಿವೃದ್ಧಿ ಹಣ ವಿನಿಯೋಗಿಸಲಾಗಿದೆ. ಗ್ರಾಮೀಣ ಪ್ರದೇಶದಲ್ಲಿ ಒಳಚರಂಡಿ ನಿರ್ಮಾಣ ಮಾಡಿದ್ದಕ್ಕೆ ಪಂಚಾಯತ್‌ ರಾಜ್ಯ ಇಲಾಖೆ ಶಹ್ಬಾಸ್‌ಗಿರಿ ನೀಡಿದೆ. ವೈಯಕ್ತಿಕ ಶೌಚಾಲಯ, ಸಾಮೂಹಿಕ ಶೌಚಾಲಯ, ಘನ ತ್ಯಾಜ್ಯ ವಿಲೇವಾರಿ ಘಟಕ, ಓಣಿಯಲ್ಲಿ ಸ್ವಲ್ಪ ನೀರೂ ವ್ಯರ್ಥವಾಗದೇ ಹೊಂಡ ಸೇರುತ್ತದೆ. ಸಸಿಗಳ ನೆಡುವಿಕೆ, ಮಾಜಿ ಪ್ರಧಾನಿ ಸರ್ದಾರ್‌ ವಲ್ಲಭಬಾಯಿ ಪಟೇಲರ ಹೆಸರಿನಲ್ಲಿ ಬಸ್‌ ಸೆಲ್ಟರ್‌ ನಿರ್ಮಾಣ, ದೇಶದ ನಕ್ಷೆಯಲ್ಲಿ ಮೆಳ್ಳಿಗೇರಿ ಗುರ್ತಿಸುವಂತೆ ಮಾಡಬೇಕೆಂಬ ನಿಲುವಿಗೆ ಪುಷ್ಠಿ ನೀಡಿದಂತಾಗಿದೆ. ಗ್ರಾಪಂ ಹಿಂದಿನ ಹಾಗೂ ಹಾಲಿ ಸದಸ್ಯರ ಪರಿಶ್ರಮವೂ ಅಡಗಿದೆ. ನಮ್ಮೂರಿಗೆ ಪ್ರಶಸ್ತಿ ಬಂದಿರುವದಕ್ಕೆ ಸಂತಸ ತಂದಿದೆ. ಇನ್ನಷ್ಟು ಅಭಿವೃದ್ಧಿಗೆ ಸಹಕಾರ ಬೇಕು. ಪಾರ್ವತೆವ್ವಾ ಸಂಕವ್ವಗೋಳ, ಗ್ರಾಪಂ ಅಧ್ಯಕ್ಷ ರು, ಮೆಳ್ಳಿಗೇರಿ
