ಬೀಳಗಿ/ಗಲಗಲಿ: ಅವಳಿ ಜಿಲ್ಲೆ ಹೋರಾಟದ ಕೊಂಡಿ ಎಂದೇ ಖ್ಯಾತರಾಗಿದ್ದ ವಾಸಣ್ಣ ದೇಸಾಯಿ ಅವರ ಅಂತ್ಯಕ್ರಿಯೆ ಬೀಳಗಿ ತಾಲೂಕಿನ ಯಡಹಳ್ಳಿ ಗ್ರಾಮದಲ್ಲಿ ಶುಕ್ರವಾರ ನಡೆಯಿತು. ಅವರ ಪಾರ್ಥಿವ ಶರೀರವನ್ನು ಗುರುವಾರ ಹುಬ್ಬಳ್ಳಿಯಿಂದ ಯಡಹಳ್ಳಿಗೆ ತರುತ್ತಿದ್ದಂತೆ ಸಾವಿರಾರು ಜನ ಕಂಬನಿ ಮಿಡಿದರು. ಅಗಲಿದ ನಾಯಕನಿಗೆ ಅಂತಿಮ ನಮನ ಸಲ್ಲಿಸಲು ಹೊರರಾಜ್ಯ ಸೇರಿದಂತೆ ರಾಜ್ಯದ ನಾನಾ ಭಾಗಗಳಿಂದ ರಾಜಕೀಯ ಧುರೀಣರು, ಮುಖಂಡರು ಆಗಮಿಸಿದ್ದರು. ವಾಸಣ್ಣ ಅವರ ತೋಟದಲ್ಲಿ ಮಧ್ಯಾಹ್ನ 1ಕ್ಕೆ ನಡೆದ ಅಂತ್ಯಸಂಸ್ಕಾರ ಸಂದರ್ಭದಲ್ಲಿ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಸಚಿವ ಎಚ್‌.ಕೆ.ಪಾಟೀಲ ಮಾತನಾಡಿ, ವಾಸಣ್ಣ ಅವರ ನಿಧನದಿಂದ ಆಲಮಟ್ಟಿ ಹಿನ್ನೀರಿನ ಸಂತ್ರಸ್ತರಿಗೆ ತುಂಬಲಾರದ ನಷ್ಟವಾಗಿದೆ. ಕೃಷ್ಣಾ ಮೇಲ್ದಂಡೆ ಯೋಜನೆ ಮುಳುಗಡೆ ಸಂತ್ರಸ್ತರಿಗೆ ಹೆಚ್ಚಿನ ಪರಿಹಾರ ಕೊಡಿಸುವಲ್ಲಿ ಅಂದಿನ ಮುಖ್ಯಮಂತ್ರಿ ಜೆ.ಎಚ್‌.ಪಟೇಲ್‌ ಹಾಗೂ ನೀರಾವರಿ ಸಚಿವ ಕೆ.ಎನ್‌.ನಾಗೇಗೌಡ ಅವರ ಮನವೊಲಿಸಲು ವಾಸಣ್ಣ ಶ್ರಮಿಸಿದ್ದರು. ನಂದಿ ಸಕ್ಕರೆ ಕಾರ್ಖಾನೆ ಆರಂಭದಲ್ಲಿ ಮಾಜಿ ಸಿಎಂ ಬಂಗಾರಪ್ಪ ಅವರ ಬಳಿ ತೆರಳಿ ಕಾರ್ಖಾನೆಗೆ 2 ಕೋಟಿ ರೂ. ಇಕ್ವಿಟಿ ಷೇರು ತರುವಲ್ಲಿ ಶ್ರಮಿಸಿದ್ದ ವಾಸಣ್ಣ ಅವರ ಸೇವೆ ಅಪಾರವಾದದ್ದು ಎಂದು ತಿಳಿಸಿದರು. --- ಸಂತಾಪ: ಅಂತ್ಯಕ್ರಿಯೆಯಲ್ಲಿ ಗದಗ ಡಾ.ತೋಂಟದ ಸಿದ್ದಲಿಂಗ ಶ್ರೀ, ಸೀಮಿಕೇರಿ ಪರಮ ರಾಮಾರೂಢ ಶ್ರೀ, ಗಿರಿಸಾಗರ ರುದ್ರಮುನಿ ಶಿವಾಚಾರ್ಯರು, ಬಿದರಿ ಶಿವಲಿಂಗ ಶ್ರೀ, ದಿಗಂಬರೇಶ್ವರ ಮಠದ ಶ್ರೀ, ಕೊಣ್ಣೂರ ಪ್ರಭು ಶ್ರೀ, ಮುತ್ತತ್ತಿ ಗುರುಲಿಂಗ ಶ್ರೀ, ಶರಣ ಡಾ.ಈಶ್ವರ ಮಂಟೂರ, ಸಚಿವರಾದ ಎಂ.ಬಿ.ಪಾಟೀಲ, ಎಚ್‌.ವೈ.ಮೇಟಿ, ಸಂಸದ ಪಿ.ಸಿ.ಗದ್ದಿಗೌಡರ, ವಿಧಾನ ಪರಿಷತ್‌ ಸದಸ್ಯ ಎಸ್‌.ಆರ್‌.ಪಾಟೀಲ, ಶಾಸಕರಾದ ಜೆ.ಟಿ.ಪಾಟೀಲ, ಸಿದ್ದು ನ್ಯಾಮಗೌಡ, ಶಿವಾನಂದ ಪಾಟೀಲ, ಹಣಮಂತ ನಿರಾಣಿ, ಮಾಜಿ ಶಾಸಕರಾದ ಪಿ.ಎಚ್‌.ಪೂಜಾರಿ, ಸಿದ್ದು ಸವದಿ, ಎನ್‌.ಎಸ್‌.ಖೇಡ, ಆರ್‌.ಆರ್‌.ಕಲ್ಲೂರ, ಎಂ.ಕೆ.ಪಟ್ಟಣಶೆಟ್ಟಿ, ಜಯಂತ ಕಾಳೆ, ಮಾಜಿ ಸಚಿವ ಅಜಯಕುಮಾರ ಸರನಾಯಕ, ಡಿ.ಕೆ.ಚಿಕ್ಕಗಲಗಲಿ, ರಾಮಣ್ಣ ತಳೇವಾಡ, ಮಹಾದೇವಪ್ಪ ಹಟ್ಟಿ, ಡಾ.ಎಂ.ಆರ್‌.ದೇಸಾಯಿ, ಮಾಜಿ ಸಂಸದ ಆರ್‌.ಎಸ್‌.ಪಾಟೀಲ, ಮಾಜಿ ಸಚಿವ ಅಮರೇಗೌಡ ಬಯ್ಯಾಪೂರ, ಮಾಜಿ ಶಾಸಕ ದೊಡ್ಡನಗೌಡ ಪಾಟೀಲ, ಜಿಪಂ ಸದಸ್ಯರಾದ ಹಣಮಂತ ಕಾಖಂಡಕಿ, ಬಸವರಾಜ ಖೋತ್‌, ಬಸವಪ್ರಭು ಸರನಾಡಗೌಡ, ಟಿ.ಕೆ.ಪಾಟೀಲ, ದೊಡ್ಡಣ್ಣ ದೇಸಾಯಿ, ಮಾರುತಿ ಮಂಟೂರ, ಮೋಹನ್‌ ಜಾಧವ, ಜಿ.ಡಿ.ದೇಸಾಯಿ, ಗಂಗಾಧರ ನಾಯಿಕ, ವೆಂಕಟೇಶ ನಾಯಿಕ ಮತ್ತಿತರರು ಭಾಗವಹಿಸಿದ್ದರು. --- ಹಿರಿಯ ಜೀವಿ ವಾಸಣ್ಣ ದೇಸಾಯಿ ಅವರ ನಿಧನದಿಂದ ಮುಳುಗಡೆ ಸಂತ್ರಸ್ತರು ತಮ್ಮ ನಾಯಕನನ್ನು ಕಳೆದುಕೊಂಡಂತಾಗಿದೆ. ನಿಷ್ಠುರವಾದಿ ಆಗಿದ್ದರೂ ರೈತರಿಗೆ ಅನ್ಯಾಯವಾದಾಗ ಸಾತ್ವಿಕ ಶಕ್ತಿ ಮೂಲಕ ಹೋರಾಟಕ್ಕೆ ಇಳಿಯುತ್ತಿದ್ದ ಇವರ ನಿಧನದಿಂದ ರೈತರು, ಬಡವರು ಅನಾಥರಾಗಿದ್ದಾರೆ. - ಎಚ್‌.ಕೆ.ಪಾಟೀಲ, ಗ್ರಾಮೀಣಾಭಿವೃದ್ಧಿ ಸಚಿವ
