ಲೋಕಾಪುರ: ಹಾಡಹಗಲೇ ಬ್ಯಾಂಕ್‌ ಸಿಬ್ಬಂದಿಯೊಬ್ಬರ ಬಳಿಯಿದ್ದ ಹಣ ದೋಚಿದ ಘಟನೆ ನಗರದಲ್ಲಿ ಶುಕ್ರವಾರ ಮಧ್ಯಾಹ್ನ ನಡೆದಿದೆ.
ಸರಣಿ ಸರ ಕಳ್ಳತನ, ಹಣ ಕಳ್ಳತನದ ಪ್ರಕರಣಗಳ ನೆನಪು ಮಾಸುವ ಮೊದಲೇ ಮತ್ತೊಂದು ಹಣ ದೋಚಿದ ಪ್ರಕರಣ ನಡೆದಿದೆ. ಬಾಪೂಜಿ ಬ್ಯಾಂಕ್‌ನ ಲೋಕಾಪುರ ಶಾಖೆಯ ಸಿಪಾಯಿ ಸಲೀಂ ಮನಿಯಾರ ಹಣ ಕಳೆದುಕೊಂಡವರು. 2 ಲಕ್ಷ ರೂ. ಹಣವಿದ್ದ ಸಲೀಂ ಅವರ ಬ್ಯಾಗ್‌ನ್ನು ಕಳ್ಳರು ಅಪಹರಿಸಿದ್ದಾರೆ. ನಗರದ ಮೆಳ್ಳಿಗೇರಿ ಕಾಂಪ್ಲೆಕ್ಸ್‌ನ ಬಾಪೂಜಿ ಬ್ಯಾಂಕ್‌ ಶಾಖೆಯಿಂದ 2 ಲಕ್ಷ ರೂ. ತೆಗೆದುಕೊಂಡು ಹೋಗುತ್ತಿರುವಾಗ ಘಟನೆ ನಡೆದಿದೆ. ಲೋಕಾಪುರಕ್ಕೆ ಬಸ್‌ ಮೂಲಕ ತೆರಳಲು ಸಲೀಂ ರೈಲ್ವೆ ನಿಲ್ದಾಣದತ್ತ ಹೊರಟಿದ್ದರು. ಆಗ ಬೈಕ್‌ ಮೇಲೆ ಬಂದ ಇಬ್ಬರು ಬ್ಯಾಗ್‌ ಎಗರಿಸಿ ಪರಾರಿಯಾಗಿದ್ದಾರೆ.
ಸಿಸಿಟಿವಿ ವೀಕ್ಷಣೆ
ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಆಗಮಿಸಿದ್ದ ಎಎಸ್‌ಪಿ ಲಕ್ಷ್ಮಿಪ್ರಸಾದ್‌ ಸಲೀಂ ಅವರಿಂದ ಮಾಹಿತಿ ಪಡೆದರು. ನಂತರ ಬೈಕ್‌ ಶೋರೂಂ ಹಾಗೂ ಬಾಪೂಜಿ ಬ್ಯಾಂಕ್‌ನ ಸಿಸಿಟಿವಿ ಕ್ಯಾಮೆರಾ ದೃಶ್ಯಾವಳಿ ವೀಕ್ಷಿಸಿದರು. ಬಾಪೂಜಿ ಬ್ಯಾಂಕ್‌ನ ಸಿಸಿಟಿವಿ ಕ್ಯಾಮೆರಾದಲ್ಲಿ ಕಳ್ಳರಿಬ್ಬರು ಬೈಕ್‌ನಲ್ಲಿ ತೆರಳಿರುವುದು ಕಂಡುಬಂದಿದೆ ಎನ್ನಲಾಗಿದೆ. ಬೈಕ್‌ನ ನಂಬರ್‌ ಸ್ಪಷ್ಟವಿರದ ಕಾರಣ ಪೊಲೀಸರಿಗೆ ಪೂರ್ಣ ಮಾಹಿತಿ ದೊರೆತಿಲ್ಲ. ಬೈಕ್‌ ಸವಾರರಿಬ್ಬರೂ ಕಪ್ಪು ಬಣ್ಣದವರಾಗಿದ್ದು, ಹೆಲ್ಮೆಟ್‌ ಧರಿಸಿರಲಿಲ್ಲ. ಪ್ರಾಥಮಿಕ ಮಾಹಿತಿ ಪ್ರಕಾರ ತಮಿಳುನಾಡು ಮೂಲದ ಕಳ್ಳರು ಹಣ ಎಗರಿಸಿರುವ ಶಂಕೆ ವ್ಯಕ್ತವಾಗಿದೆ. ಬಾಗಲಕೋಟ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪಿಎಸ್‌ಐ ಐ.ಆರ್‌.ಪಟ್ಟಣಶೆಟ್ಟಿ ತನಿಖೆ ಕೈಗೊಂಡಿದ್ದಾರೆ.
ಇನ್ನೂ ಬಂಧನವಾಗಿಲ್ಲ
ನಗರದಲ್ಲಿ ಸರಗಳ್ಳತನ ಮಾಡಿದ ಆರೋಪಿಗಳನ್ನು ಪೊಲೀಸರು ಇನ್ನೂ ಬಂಧಿಸಿಲ್ಲ. ಆರು ತಿಂಗಳ ಹಿಂದೆ ನಡೆದ ಪ್ರಕರಣದಲ್ಲಿ ವೃದ್ಧೆಯೊಬ್ಬರಿಂದ ಬೈಕ್‌ ಸವಾರರಿಬ್ಬರು ಹಣ ದೋಚಿ ಪರಾರಿಯಾಗಿದ್ದರು. ಇತ್ತೀಚೆಗೆ ನವನಗರದಲ್ಲಿ ವ್ಯಕ್ತಿಯೊಬ್ಬರಿಂದ 15 ಸಾವಿರ ರೂ. ದೋಚಲಾಗಿತ್ತು. ಇದೀಗ ಮಧ್ಯಾಹ್ನವೇ ಕಳ್ಳತನದ ಪ್ರಕರಣ ನಡೆದಿರುವುದು ಸಾರ್ವಜನಿಕರಲ್ಲಿ ಆತಂಕ ಮೂಡಿಸಿದೆ.