ರೈಲು ಬಂತು ರೈಲು
: ಐತಿಹಾಸಿಕ ಬಾಗಕೋಟ-ಕುಡಚಿ ರೈಲ್ವೆ ಮಾರ್ಗದಲ್ಲಿ ಬುಧವಾರ ಪ್ರಾಯೋಗಿಕ ರೈಲು ಸಂಚರಿಸುವುದರೊಂದಿಗೆ ಜಿಲ್ಲೆಯ ಇತಿಹಾಸದಲ್ಲಿ ಹೊಸ ಹೆಜ್ಜೆ ಗುರುತು ದಾಖಲಾಯಿತು.
ಶತಮಾನದ ಯೋಜನೆ ಎಂದು ಕುಖ್ಯಾತವಾಗಿರುವ ಬಾಗಲಕೋಟ-ಕುಡಚಿ ಮಾರ್ಗದಲ್ಲಿ 33 ಕಿ.ಮೀ. ವರೆಗಿನ ಮಾರ್ಗ ಈಗ ಸಂಚಾರಕ್ಕೆ ಮುಕ್ತವಾಗಿದೆ. ರೈಲ್ವೆ ಇಲಾಖೆಯ ಹಿರಿಯ ಅಧಿಕಾರಿಗಳ ನೇತೃತ್ವದಲ್ಲಿ ಬುಧವಾರ ಸಂಚರಿಸಿದ ರೈಲಿಗೆ ಹೋರಾಟಗಾರರು, ಸಾರ್ವಜನಿಕರು ಆತ್ಮೀಯ ಸ್ವಾಗತ ನೀಡಿದರು. ಹೊಸ ರೈಲು ಮಾರ್ಗ ಆರಂಭಗೊಂಡಿರುವುದರಿಂದ ಬಾಗಲಕೋಟ ನಿಲ್ದಾಣ ಜಂಕ್ಷನ್‌ ಮಾನ್ಯತೆ ಪಡೆಯಿತು.
ಟ್ರಾಲಿಗಳಲ್ಲಿ ಪರಿಶೀಲನೆ
ನಗರದ ರೈಲು ನಿಲ್ದಾಣದಲ್ಲಿ ಬೆಳಗ್ಗೆ 8ಕ್ಕೆ ಗಣೇಶ ಪೂಜೆ ಸಲ್ಲಿಸಿ, ಕುಂಬಳಕಾಯಿ ಒಡೆದು ರೈಲಿಗೆ ಶುಭ ಕೋರಲಾಯಿತು. ನಿಲ್ದಾಣದಿಂದ ಹೊರಟ ರೈಲು ಖಜ್ಜಿಡೋಣಿ ತಲುಪಿತು. ನಂತರ ಹಳಿಯ ಸದೃಢತೆ ಹಾಗೂ ಸುರಕ್ಷತೆ ಪರೀಕ್ಷೆಗೆ ಚಾಲನೆ ನೀಡಲಾಯಿತು. ರೈಲ್ವೆ ಇಲಾಖೆಯ ಸುರಕ್ಷತೆ ಆಯುಕ್ತ ಎ.ಕೆ.ಮನೋಹರ್‌ ನೇತೃತ್ವದ ತಂಡ ಟ್ರಾಲಿಗಳಲ್ಲಿ ಹಳಿಯಲ್ಲಿ ಸಂಚರಿಸಿತು. ಫಿಶ್‌ಪ್ಲೇಟ್‌, ಹಳಿಗಳ ಮಧ್ಯದ ಅಂತರ, ಒತ್ತಡ ನಿರ್ವಹಣೆ, ಜಲ್ಲಿ ಕಲ್ಲುಗಳ ಭದ್ರತೆಯನ್ನು ಈ ತಂಡ ಪರಿಶೀಲಿಸಿತು. ಐದಕ್ಕೂ ಹೆಚ್ಚು ಟ್ರಾಲಿಗಳಲ್ಲಿ 50ಕ್ಕೂ ಹೆಚ್ಚು ಅಧಿಕಾರಿಗಳು ತಮ್ಮ ವಿಭಾಗದ ಪರೀಕ್ಷೆಗಳನ್ನು ಕೈಗೊಂಡರು. ಟ್ರಾಲಿಗಳಲ್ಲಿ ಕುಳಿತಿದ್ದ ಅಧಿಕಾರಿಗಳು ತಮ್ಮ ನೋಟ್‌ ಬುಕ್‌ನಲ್ಲಿ ಮಾಹಿತಿಗಳನ್ನು ದಾಖಲಿಸಿದರು.
ಪರಿಶೀಲನೆ ಸಂದರ್ಭದಲ್ಲಿ ಗ್ಯಾಂಗ್‌ಮನ್‌ಗಳು, ಕಾರ್ಮಿಕರು ಹಾಗೂ ಅಧಿಕಾರಿಗಳು ಸೇರಿದಂತೆ 150ಕ್ಕೂ ಅಧಿಕ ಜನ ಸಾಥ್‌ ನೀಡಿದರು. ಸಂಜೆ 4.50ಕ್ಕೆ ಖಜ್ಜಿಡೋಣಿಯಿಂದ ಹೊರಟ 7 ಬೋಗಿಗಳುಳ್ಳ ರೈಲು ಬಾಗಲಕೋಟ ನಿಲ್ದಾಣಕ್ಕೆ 5.35ಕ್ಕೆ ಆಗಮಿಸಿತು. ಅಂದಾಜು 125 ಕಿ.ಮೀ. ವೇಗದಲ್ಲಿ ರೈಲು ಓಡಿಸುವ ಮೂಲಕ ಮಾರ್ಗದ ದೃಢತೆ ಪರಿಶೀಲಿಸಲಾಯಿತು. ನಿಲ್ದಾಣಕ್ಕೆ ರೈಲು ಆಗಮಿಸುತ್ತಿದ್ದಂತೆ ಇಲಾಖೆ ಸಿಬ್ಬಂದಿ, ಪ್ರಯಾಣಿಕರು ಹಾಗೂ ರೈಲ್ವೆ ಹೋರಾಟಗಾರರು ಚಪ್ಪಾಳೆ ಮೂಲಕ ಸ್ವಾಗತಿಸಿದರು.
ಪ್ರತಿ ನಿತ್ಯ ಸಂಚರಿಸಲಿ
ಬೆಳಗ್ಗೆ ನಿಲ್ದಾಣದಲ್ಲಿ ನಡೆದ ಸಮಾರಂಭದಲ್ಲಿ ಪರಿಶೀಲನೆಗೆ ಆಗಮಿಸಿದ ಹಿರಿಯ ಅಧಿಕಾರಿಗಳನ್ನು ರಾಜ್ಯ ಬ್ರಾಡ್‌ಗೇಜ್‌ ರೈಲ್ವೆ ಹೋರಾಟ ಸಮಿತಿಯಿಂದ ಸನ್ಮಾನಿಸಲಾಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ಸಮಿತಿ ಅಧ್ಯಕ್ಷ ಕುತುಬುದ್ದೀನ್‌ ಖಾಜಿ 'ಬಾಗಲಕೋಟ ಜಿಲ್ಲೆಯ ಮಟ್ಟಿಗೆ ಇಂದು ಹೊಸ ದಾಖಲೆ ನಿರ್ಮಾಣವಾಗಿದೆ. ಬಾಗಲಕೋಟ, ಬೆಳಗಾವಿ ಜಿಲ್ಲೆಯ ಜನರ ಹಲವು ವರ್ಷಗಳ ಬೇಡಿಕೆ ಈಡೇರಿದಂತಾಗಿದೆ. ಆದರೆ ಕೇವಲ 33 ಕಿ.ಮೀ. ಮಾರ್ಗ ಮಾತ್ರ ಪೂರ್ಣಗೊಂಡಿರುವುದು ದುರಂತವಾಗಿದೆ. ಸರಕಾರ ತಕ್ಷಣ ಕುಡಚಿವರೆಗಿನ ಪ್ರದೇಶದಲ್ಲಿ ಭೂಸ್ವಾಧೀನ ಕೈಗೊಳ್ಳಬೇಕು. ಆ ಭಾಗದ ರೈತರಿಗೆ ಸಮರ್ಪಕ ಪರಿಹಾರ, ಉದ್ಯೋಗಾವಕಾಶ ಒದಗಿಸಬೇಕು. ಶೀಘ್ರದಲ್ಲಿ ಯೋಜನೆ ಮುಗಿಸಿ ಕುಡಚಿವರೆಗೆ ರೈಲು ಸಂಚಾರ ಆರಂಭಗೊಳ್ಳಬೇಕು. ಸಮಿತಿಯ ನಿರಂತರ ಹೋರಾಟದಿಂದ ಮಾರ್ಗದಲ್ಲಿ ರೈಲು ಸಂಚಾರ ಚುರುಕುಗೊಂಡಿದೆ. ಖಜ್ಜಿಡೋಣಿಗೆ ಪ್ರತಿ ದಿನ ರೈಲು ಸಂಚರಿಸುವಂತಾಗಬೇಕು' ಎಂದರು. ಉಪವಿಭಾಗಾಧಿಕಾರಿ ಶಂಕರಗೌಡ ಸೋಮನಾಳ, ಹಿರಿಯ ರೈಲ್ವೆ ಅಧಿಕಾರಿಗಳನ್ನು ಸನ್ಮಾನಿಸಲಾಯಿತು. ನೈಋುತ್ಯ ರೈಲ್ವೆ ವಲಯದ ಚೀಫ್‌ ಎಂಜಿನಿಯರ್‌ ರಮಣ್‌, ಡಿಆರ್‌ಎಂ ಎ.ಕೆ.ಜೈನ್‌, ಸಿಎಒ ಅಶೋಕ ಗುಪ್ತಾ, ಮಾರ್ಗದ ಉಸ್ತುವಾರಿ ವೆಂಕಟರಾವ್‌, ಸಮಿತಿ ಉಪಾಧ್ಯಕ್ಷ ಶ್ರೀನಿವಾಸ ಬಳ್ಳಾರಿ, ದಾಮೋದರ ರಾಠಿ ಹಾಗೂ ಅಧಿಕಾರಿಗಳು ಇದ್ದರು.