ಮುಧೋಳ: ಮೂರು ವರ್ಷಗಳಿಂದಲೂ ಬರಗಾಲ ಹಿನ್ನಲೆಯಲ್ಲಿ ರನ್ನ ವೈಭವ ನಡೆಸಲು ಸಾಧ್ಯವಾಗಿರಲಿಲ್ಲ. ಪ್ರಸಕ್ತ ವರ್ಷ ವೈಭವ ನಡೆಸ ನಿರ್ಧರಿಸಲಾಗಿದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಆರ್‌.ಬಿ.ತಿಮ್ಮಾಪೂರ ತಿಳಿಸಿದ್ದಾರೆ.
ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಾರ್ವಜನಿಕರು, ರನ್ನನ ಅಭಿಮಾನಿಗಳು,ಸಾಹಿತಿಗಳು ವೈಭವನ್ನು ಅದ್ಧೂರಿಯಾಗಿ ಆಚರಿಸಲು ಉತ್ಸುಕರಾಗಿದ್ದಾರೆ. ಇದು ಜನರ ಉತ್ಸವವಾಗಬೇಕು. ಸಂಘ ಸಂಸ್ಥೆಗಳು ಜನಪ್ರತಿನಿಧಿಗಳು ಯಶಸ್ವಿಗೆ ಸಹಕರಿಸಬೇಕೆಂದು ಮನವಿ ಮಾಡಿಕೊಂಡಿದ್ದಾರೆ.
ಫೆ.23 ರಂದು ರನ್ನಬೆಳಗಲಿಯಲ್ಲಿ ಸಚಿವೆ ಉಮಾಶ್ರೀ ಉದ್ಘಾಟಿಸಲಿದ್ದಾರೆ. ಫೆ.25ಕ್ಕೆ ಸಿಎಂ ಸಿದ್ಧರಾಮಯ್ಯನವರು ಮುಧೋಳ ರನ್ನಕ್ರೀಡಾಂಗಣದ ಸಮಾರೋಪ ಸಮಾರಂಭಕ್ಕೆ ಆಗಮಿಸಲಿದ್ದಾರೆ. ಶಾಸಕ ಗೋವಿಂದ ಕಾರಜೋಳ ಅಧ್ಯಕ್ಷ ತೆ ವಹಿಸಲಿದ್ದಾರೆ. ಜಿಲ್ಲೆಯ ಶಾಸಕರು, ಸಂಸದರು, ಜನಪ್ರತಿನಿಧಿಗಳೂ, ಅಧಿಕಾರಿಗಳು ಭಾಗವಹಿಸಲಿದ್ದಾರೆ. ರನ್ನ ವೈಭವಕ್ಕೆ ಬೇಕಾದ ಎಲ್ಲಾ ಸಿದ್ಧತೆಗಳು ನಡೆದಿವೆ. ರನ್ನ ಬೆಳಗಲಿಯಲ್ಲಿ ರನ್ನನ ಅಭಿಮಾನಿಗಳು ಪಾಲ್ಗೊಂಡು ಯಶಸ್ವಿಯಾಗಿ ಮಾಡುತ್ತಾರೆ. ಇದೇ ಮೊದಲ ಬಾರಿಗೆ ಬೆಳಗಲಿಯಲ್ಲಿ ಆಯೋಜಿಸುತ್ತಿರುವುದು ನನಗೂ ಸಂತಸ ತಂದಿದೆ ಎಂದರು. ಪಕ್ಷಾತೀತ,ಸಾಮಾರಸ್ಯ ಸಾರುವ ರನ್ನ ವೈಭವ ಆಗಲಿದೆ.
ರನ್ನ ಪ್ರತಿಷ್ಠಾನ ಅಧ್ಯಕ್ಷ , ಜಿಲ್ಲಾಧಿಕಾರಿ ಕೆ.ಶಾಂತರಾಮ ಮಾತನಾಡಿ,ರನ್ನ ವೈಭವ ಬರೀ ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಸೀಮಿತಗೊಳಿಸದೇ ಸಾಹಿತ್ಯ ಚಟುವಟಿಕೆಗಳು ನಡೆಯಬೇಕು. ರನ್ನ ಕ್ರೀಡೆಗಳು ಜರಗಿಸಲು ಜಿಲ್ಲಾಡಳಿತ ಉತ್ಸುಕತೆ ತೋರಿದೆ. ರನ್ನ ಪ್ರಶಸ್ತಿಯನ್ನು ಮೂರು ಜನರಿಗೆ ನೀಡಲು ತೀರ್ಮಾನಿಸಲಾಗಿದೆ. ಮೂರು ವರ್ಷದ ಅವಧಿಯಲ್ಲಿ ಆಗದೇ ಉಳಿದ ಹಣದಲ್ಲಿ ವೈಭವ ಕಾರ್ಯಕ್ರಮ ವಿಜೃಂಭನೆಯಿಂದ ಮಾಡಲಾಗುವುದು. ರಾಜ್ಯದ ನಾನಾ ವಿಶ್ವ ವಿದ್ಯಾಲಯಗಳಿಂದ ಸಂಶೋಧಕರು, ವಿದ್ಯಾರ್ಥಿಗಳು ಭಾಗವಹಿಸಲಿದ್ದಾರೆ. ಎರಡು ದಿನಗಳ ಕಾಲ ರನ್ನ ಭವನದಲ್ಲಿ ಪರಾರ‍ಯಯವಾಗಿ ಅಹಿಂಸೆ ತತ್ವದಲ್ಲಿ ಗೋಷ್ಟಿ, ಕವಿಗೋಷ್ಠಿಗಳು ಆಯೋಜಿಸಲಾಗಿದೆ. ಎಲ್ಲರೂ ಭಾಗವಹಿಸಿ ಯಶಸ್ವಿಗೊಳಿಸಬೇಕು. ನಮ್ಮೂರಿನ ರಾಜ್ಯದ ಹಬ್ಬವಾಗಿ ಪರಿವರ್ತನೆಯಾಗುತ್ತದೆ ಎಂಬ ನಂಬಿಕೆಯಿದೆ. ತಡವಾಗಿದ್ದರೂ ಯಶಸ್ವಿಗೊಳಿಸಲು 18 ಸಮಿತಿಗಳ ತಂಡ ಹಗಲು ಇರಳು ಪ್ರಯತ್ನ ಮುಂದುವರಿಸಲಿವೆ ಎಂದು ಜಿಲ್ಲಾಧಿಕಾರಿಗಳು ತಿಳಿಸಿದ್ದಾರೆ.
ಉಪವಿಭಾಗಾಧಿಕಾರಿ ರವೀಂದ್ರ ಕರಲಿಂಗಣ್ಣವರ ಮಾತನಾಡಿ, ರನ್ನ ವೈಭವಕ್ಕೆ ಬೇಕಾದ ಎಲ್ಲ ಸಿದ್ಧತೆ ನಡೆದಿವೆ. ರನ್ನ ರಥಯಾತ್ರೆ ಬೆಳಗಲಿಯಿಂದ ಆರಂಭವಾಗಿ ಮತ್ತೆ ಬೆಳಗಳಿಗೆ ಬರುವ ಹಾಗೆ ಸಮಯ ನಿಗದಿಸಲಾಗಿದೆ. ತಾಲೂಕಿನ ಎಲ್ಲ ಗ್ರಾಪಂಗಳಿಗೆ ತೆರಳಿ ರನ್ನ ರಥಯಾತ್ರೆ ವೈಭವಕ್ಕೆ ಆಹ್ವಾನಿಸಲಿದೆ. ಸಾರ್ವಜನಿಕರು ಸ್ವಾಗತಿಸಬೇಕೆಂದು ಮನವಿ ಮಾಡಿಕೊಂಡಿದ್ದಾರೆ. ಅಧಿಕಾರಿಗಳು ಕಾರ್ಯಪ್ರವೃತ್ತಿಯಾಗಿ ಕೆಲಸ ನಿರ್ವಹಿಸಲು ಸೂಚಿಸಲಾಗಿದೆ ಎಂದರು. ಡಿಸಿಸಿ ಬ್ಯಾಂಕ್‌ ಉಪಾಧ್ಯಕ್ಷ ಶಿವಾನಂದ ಉದಪುಡಿ, ತಾಪಂ ಅಧ್ಯಕ್ಷ ತಿಮ್ಮಣ್ಣ ಬಟಕುರ್ಕಿ, ರಾಜುಗೌಡ ಪಾಟೀಲ, ವಿನಯ ತಿಮ್ಮಾಪುರ, ಸಂಗಪ್ಪ ಇಮ್ಮನ್ನವರ, ಕೃಷ್ಣಪ್ಪ ಕನಕರೆಡ್ಡಿ ಇತರರು ಇದ್ದರು.
ಚಾಲುಕ್ಯ ಉತ್ಸವ
ರಾಷ್ಟ್ರೀಯ ಚಾಲುಕ್ಯ ಉತ್ಸವವೂ ಸಹ ಮಾರ್ಚ್‌ ಎರಡನೇ ವಾರದಲ್ಲಿ ನಡೆಸಲು ಜಿಲ್ಲಾಧಿಕಾರಿಗಳಿಗೆ ಸೂಚಿಸಲಾಗಿದೆ. ಇದಕ್ಕೆ ಪೂರಕವಾಗಿ ಎರಡು ಸಭೆಗಳನ್ನು ಮಾಡಲಾಗಿದೆ. ರನ್ನ ವೈಭವದಂತೆಯೂ ಚಾಲುಕ್ಯ ಉತ್ಸವಕ್ಕೆ ಮಹತ್ವ ಕೊಡಲಾಗಿದೆ. ನೀತಿ ಸಂಹಿತೆ ಬಂದರೆ ಮಾತ್ರ ಉತ್ಸವ ಕೈ ಬಿಡುವ ಪ್ರಸಂಗ ಬರಬಹುದು. ಖಂಡಿತಾ ಚಾಲುಕ್ಯ ಉತ್ಸವ ಆಚರಿಸಲಾಗುವುದು. ಯಾವುದೇ ಗೊಂದಲ ಬೇಡ. ನನ್ನ ಅಧಿಕಾರದ ಹಿಂದಿನ ಅವಧಿಯಲ್ಲಿ ಚಾಲುಕ್ಯ ಉತ್ಸವ ಮಾಡಲಾಗಿತ್ತು ಎಂದು ತಿಮ್ಮಾಪೂರ ಹೇಳಿದ್ದಾರೆ.